話說有間本地行早幾年同間內地行合併，唔經唔覺已經過咗Lock-up期，舊舖班元老高層亦一個個悄悄下堂而去，金占士初頭聽到，大有「兔死狗烹」之感，但老友同金占士講，佢哋心裏面係笑住走o架。
此話何解呢？原來呢班舊高層，就係恃住有幾年嘅Lock-up期，以進行新舊交接融合，於是就好似手執「免死金牌」咁，明知道唔會畀人炒，咁就梗係要為自己打算一吓啦。咁可以點做呢，就係有錢齊齊搵喇。
方法係成班高層幫自己友勁加人工，而其中一位年薪更加高到等於一球美金，過咗咁多年，都收夠「籌」自己搞生意、開舖，或者「印印腳」搵新工啦。
金占士知道，其實班新老細都知道情況，不過又唔可以發作，惟有隻眼開隻閉，近年好多刁，新舊班子都築起好高大嘅「防火牆」，母公司拎返嚟嘅刁，係唔會畀舊班子插隻腳入嚟，總之各有各做，可謂河水不犯井水，而慢慢形成舊班子好「hea」。
其實講真，金融界好現實，即使呢班舊臣唔狂加自己人工，又為新老闆慳錢兼搏老命攞刁，到今日Lock-up期滿，都未必會留低你哋兼加你人工，最頂層一定會留返畀內地母公司派落嚟嘅老總。
金占士