依家幾乎人人習慣用iPhone呢類嘅工具，作為生活同埋工作嘅一部分，做銷售服務嘅，就更加「i」不離身。好似中銀人壽執行董事蔡中虎（CF）同AXA安盛行政總裁夏偉信，就一人用咗一個蘋果產品嚟sell業務重點喇！
絲絲經常見到「銀保渠道」呢堆詞組，究竟銀保模式有咩好，CF就以iPhone嘅成功作為比喻，智能手機成功在佢集多功能於一身，買嘅人都係求方便，「拆開睇，根本就係一部影相機、一部電腦和一部電話。」
「銀保模式同樣係一個平台，但可以為客戶提供多元化嘅服務，無論你想買保險定係買股票，或者匯錢都可以去銀行搞掂！」
除咗方便，買保險當然係講個「信」字，如果保險產品無咁複雜就最好，夏偉信早排同絲絲講，希望透過提升AXA安盛嘅服務，等客戶買保險嗰陣，好似買「i」產品咁easy going，「客戶只需要知道點解要買、買緊咩、出咗事會賠啲咩，剩番嗰啲就係保險公司履行合約上嘅承諾。」
呢兩位保險界高人，咁識得演繹用新科技推動保險，抵佢哋咁成功嘅。