據絲絲所知，參與內幕交易多數都係以罰錢收場，或者被判入獄；但原來內幕交易嘅代價除咗呢兩項之外，分分鐘可能連個老婆都無埋！
Playboy Enterprises Inc.前總裁Christie Hefner早前就自爆話，原來同佢結婚十五年嘅老公William Marovitz，因為參與內幕交易而畀美國證交會（SEC）請去問話，而且佢偷偷哋買賣嘅股票，仲係老婆做揸fit人嘅Playboy添！
Christie話，兩年前某一日，佢老公突然喺屋企同佢剖白。Christie話自己事前全不知情，可想而知當時佢會有幾震驚。
其實睇番過去五年，SEC都因為內幕交易而拘捕過不下四百人，佢哋都有個共通點，就係背叛咗身邊嘅客戶、同事、朋友、親戚等等。
不過今次William借枕邊人過橋，利用老婆喺Playboy嘅職位攞着數，好有可能令到兩人婚姻亮起紅燈。如果為錢傷到兩夫妻感情，絲絲真係覺得好可惜。