金融徐筆:萬順昌醞釀新升浪

近排啲中資建築股升到「嘭嘭聲」,都係因為估緊內地將加大基建投資嚟保經濟增長。呢類概念有離香港這樣遠,那麼近咁嘅感覺,但其實唔駛羨慕人,因為我哋都有十大基建項目。本地建築股雖然喺過去十幾年股價都休養生息,但好多公司並非原地踏步等運到,反而積極改革,而當中Prof. J就好欣賞有半個世紀歷史嘅萬順昌集團(01001)。

萬順昌無論喺鋼材分銷、建築產品以及塑料分銷業務方面都擁有鞏固基礎。早前宣布咗一份唔錯嘅中期業績,集團喺上半年扭虧為盈,溢利錄得約3,200萬元,升1.8倍,鋼材分銷嘅毛利率更由上年同期嘅負數大幅改善至9%,派發中期股息2.3港仙。

基建帶動鋼材需求

業績成功虧轉盈,除咗因為集團改善鋼材存貨控制同優化利潤率,主要係受惠於香港同澳門蓬勃發展嘅建築市場。公司主席話隨着十大基建項目陸續開展,以及發展公屋係梁特首嘅主要基石,這有助確保香港未來幾年對鋼材嘅強大需求。另外,澳門嘅公屋同賭場建設項目又不斷增加,令集團銷售及毛利均有改善。

建造業步入柴九嘅「黃金十年」,喺低估值、高增長嘅大前提下,Prof. J覺得建築股嘅升浪唔止咁少。今年開展嘅尖沙咀廣深港高鐵總站、港珠澳大橋、港鐵沙中線等短期上馬項目,統統都係大deal。萬順昌股價長期處於大折讓水平,依家好似發番威咁。如果睇好香港基建前景,目前估值都可以。繼續追蹤,出發!

香港大學電子金融服務榮譽助理教授 徐燦傑