絲絲講場：卓百德做希慎獨董啱胃口
每次提起卓百德，好多人都即刻會記起佢係大摩前董事總經理，不過由尋日起，佢又多一個身份喇，因為希慎興業（00014）委任咗佢做獨立非執行董事。絲絲覺得，佢今次加入希慎，完全符合佢嘅投資取態，即係睇好地產股，同埋盡量搵有租金收入嘅工具。
絲絲當然好想第一時間恭喜卓百德，可惜電話聯絡唔上，惟有電郵聯絡啦，順便好想問佢點解香港咁多地產上市公司唔揀，偏偏選擇接納希慎嘅委任做非執董呢？係咪有猛人邀請佢呢？
睇好收租股 籲撤辣招
點知佢老人家似乎唔係好想講呢個題目，話自己無主動揀上市公司，只係被動地接受邀請。又話上市公司通常會選擇一啲已經預備好，同埋有能力嘅人加入。
卓百德早前經已唱好地產股，話如果股價回調10至15%就一定要買。佢亦都公開講過，政府應該撤銷買家印花稅（BSD）同埋額外印花稅（SSD）等辣招，以免谷高樓價，造成市場不穩，而佢都屬於穩陣派嘅投資者，因為佢經常推介房託基金（REIT）同埋一啲定息金融產品。
今次佢肯做希慎非執董，完全符合佢近來少住宅、多商業租金收入嘅投資取態喎。