絲絲講場:滙豐醫療福利同居都有

以前滙豐員工同佢哋嘅合法配偶先可以享有員工醫療福利,不過喺明年新制下,連未結婚嘅員工,都可以幫同居伴侶申請埋醫療福利,而且無論你嘅伴侶係同性定係異性,都一樣申請得,金占士實在覺得滙豐好前衞!

迎合潮流 不分攣直

金占士打聽到,滙豐內部堅稱今次嘅改制唔係為咗cut cost,仲話分分鐘使多咗錢,點解要推行新制?

之唔係為咗配合社會情況囉!社會上,有人只想同居,唔想結婚;又有聲音要為同性戀爭取更多權益,滙豐今次改制真係幾貼近社會狀況!

據講,滙豐嘅員工醫療福利分新舊兩制,並以○七年為分界線,早排滙豐人事部就該行醫療福利制度做咗個調查,發現○七年前入職嘅員工同○七年後入職嘅員工互相眼紅對方嘅福利,為咗大家工作氣氛和諧啲,決定一次過推行新制。

無分新舊 待遇睇齊

係新制度之下,所有員工到指定醫生求診,一律收20蚊診金,但同時員工可以選擇光顧非指定醫生,之後再向銀行申請攞番診金。

之前滙豐不停賣非核心業務,當中有好多都係保險業務,唔知係咪同保險公司啲合作唔同咗,金占士收到風,以前啲醫生見有人拎住張滙豐醫療卡,就會鬆手啲,明明撞親個頭,會幫你照埋肺,依家當然無呢支歌仔唱啦!

金占士