有關領匯（00823）嘅新聞經常都係負面多過正面，所以一啲有趣嘅消息好多時被掩蓋咗。好似八月嘅時候，領匯推出咗「企業員工購股計劃」可能冇乜人知，簡單嚟講，就係公司資助員工去買領匯嘅股票。
最近呢個計劃終於有數字喇，有領匯員工用「搶住要」嚟形容第一期嘅情況，有348人即係近半合資格員工參與，涉及買入7.3萬個基金單位，總額約300萬元。
絲絲好奇怪，點解十一月初領匯中期業績嘅時候，披露呢個計劃仲未有人參與，依家大家又忽然搶住要呢？
原來個計劃要通過審查，領匯員工需要按年資，同埋工作表現被評級，員工可選擇月薪嘅指定比例，以每季供款形式去買領匯股票，而公司會按評級資助10%至20%供款。上星期五先至係第一次供款，聽講領匯資助咗超過42萬元。至於員工購入後係冇禁售期，可以自由出售架！
睇嚟喺領匯入面做都有唔少福利，好似十一月八日，公司就通過咗所有員工可以喺生日當天享受有薪假期，而如果生日踏正周末或者公眾假期，就可以選擇係假期前或後一日補假。
不過始終領匯入主咗屋邨商場之後，租金加幅確實係比以前快，絲絲覺得，如果領匯嘅租客都可以享受到購股資助計劃，咁每一年畀人加租，條氣都會順啲啦。