絲絲講場：永隆朱琦橋牌會客
橋牌係內地好流行嘅活動，絲絲識得好多駐紮香港嘅內地高管，都係橋牌高手，好似永隆銀行行政總裁朱琦就係其中一個。永隆近日就搞咗場「橋牌精英大賽」，朱總仲親自落場，同咁多位高手過招添！
永隆時不時都會舉辦唔同類型嘅客戶活動，據聞呢次橋牌活動反應非常熱烈，除咗本地嘅財富管理客戶、香港橋牌協會會員外，仲有內地客戶專程由深圳來港參賽，果然係高手雲集，行內公認嘅橋牌高手朱總都技癢呢！
講究戰略 工作啱用
朱總同絲絲講，佢由讀書時期開始玩國際橋牌，咁就可以解釋到點解朱總玩橋牌嘅技術咁了得。佢仲話，橋牌係一項講求合作、智慧同需要配合戰略嘅競技，所以打橋牌對解決工作上嘅問題，有好大幫助！朱總亦表明心意，話希望將來可以繼續舉行橋牌大賽，等更多客戶及同事參與呢項益智活動！
絲絲對橋牌可謂一竅不通，今日先知道背後有咁多學問，尤其可以訓練思維，有機會一定要向朱總取經，惡補一年後，話唔定大家可以喺下一次嘅「橋牌精英大賽」見到絲絲呢！