銀行對服務年資高嘅同事通常都會送啲紀念品，即係俗稱嘅「老人牌」，增加員工歸屬感，其實「老人牌」未必係一塊牌，好多時都會送手錶，例如喺永隆做夠25年，公司會送番隻名貴手錶畀老臣子，不過聽聞今年改咗制，轉送升值能力更高嘅「金章」。
絲絲問過永隆，佢哋話今年無再送錶，因為隻錶嘅款式已經停產，轉咗送金章，價值同舊時送隻錶差唔多，而且黃金依家升值能力更高咁話。
不過依家金價升到咁高，所以個金章唔算好大，未能夠稱得上叫金牌；不過金章嘅投資價值始終高啲，況且手錶品味呢樣嘢，非常個人，送金可能反而更百搭。
當年渣打（02888）都會送「撈」畀做咗30年嘅老臣子，當年中國區總裁黃遠輝（Stanley）就係其中一位，佢依家仍然係戴住嗰隻印住渣打標誌嘅「撈」，真念舊，不愧係Stanley。
余詩韻