絲絲講場:鄧掌門改招牌 縮龍成寸

喺股壇有「師奶殺手」之稱嘅AMTD證券及財富管理業務總經理鄧聲興(Kenny)向絲絲透露,今年由佢擔任第六屆主席嘅「香港專業財經分析及評論家協會」,已正式改名做「香港股票分析師協會」。個名縮短咗咁多?Kenny解釋:「因為太多人話之前協會個名太長,聽咗都唔記得,講咗又唔知有無講錯,所以我哋咪徇眾要求改名囉。」

放棄公投 專人設計Logo

既然改名,協會Logo(會徽)會換嘛?佢話:「早前我呼籲每個會員都設計一個logo出嚟公投,最高票數就可以成為協會嘅新Logo」,雖然Kenny自己都有參與設計,「不過為咗控制質素,最後我哋都係搵咗專業人士去設計!」

呢個會每年都搞唔少聯誼活動,咁點樣可以入會?Kenny笑笑口話:「由於本身會員嘅資歷較深,喺業界都算德高望重,入會準則存在先天性限制,就係你一定要喺業界有一定知名度同曝光率,而永久會費就好抵,只需要500蚊就得。」

收到,即是唔係話想入就入得到,入得到會都有番咁上下,明晒。

絲絲諗番起,呢個會喺今年六月選「掌門」之時,少壯派嘅Kenny同元老派嘅恒豐證券林家亨呢兩位財經名嘴,選前本來磨拳擦掌,大家本來等住睇呢場選戰風雲,點知選舉當晚,當做咗8年(共四屆)主席決定退任嘅藺常念叫出新掌門候選人時,林家亨放棄出戰,結果由Kenny喺無對手下自動當選。咁峰迴路轉,絲絲依家仲記得。

余詩韻