絲絲講場：中上兩影鬥快滬上市
絲絲平日得閒都會走去睇吓戲，發現近年內地都有唔少大片，例如《唐山大地震》、《孔子》同埋《紅河谷》咁，原來呢幾套戲都係分別由內地兩大電影集團，即係中國電影集團（中影）同上海電影集團（上影）製作。最近絲絲仲聽聞呢兩間公司已經喺上海證交所（上交所）遞交IPO申請，睇嚟佢哋除咗要喺影壇上爭做一哥之外，就連螢幕以外都要爭做第一隻喺上交所上市嘅國有電影股。
中影一條龍 上影唔輸蝕
中影係內地政府指定唯一擁有影片進口權嘅公司，年產三十幾部電影同四百幾集電視劇，香港人熟悉嘅有《投名狀》、《十月圍城》等。舊年仲同另一個媒體成立中影股份，所經營業務差唔多覆蓋晒所有電影嘅產業鏈，好似租借拍攝器材、製片、洗印、發行咁，可以話係內地影媒嘅龍頭大哥。
不過，上影都唔弱o架，佢隸屬上海文化廣播影視集團，係內地第二大傳媒企業，有自己嘅製片廠、電影院線、電影頻道同大型拍攝場地，有份出品嘅電影包括《一江春水向東流》、《美麗上海》咁，以推動華語電影為理念。
現時已成功喺內地上市嘅民營電影公司，就有華誼兄弟同博納影業，不過講到上交所呢，暫時就未有。呢場影壇上市戰，睇嚟都會有一番龍爭虎鬥。不過學絲絲話齋，最大得益嘅一定係廣大嘅影迷，因為集資即係代表會拍多啲大片啦。