依家網上購物方便，絲絲好多朋友都鍾意上網shopping，不過網店愈開愈多，有時都唔知幫襯邊間好。想喺千千萬萬嘅網店當中突圍而出，真係少啲計仔都唔得。最近有一位叫Brian Lee嘅韓裔律師，佢利用荷里活明星效應，加埋緊貼潮流嘅經營手法，將兩間網店搞得有聲有色。聽聞因為咁，佢喺荷里活都幾出名。
呢位律師點解突然轉行搞網上生意，絲絲真係唔知，不過就知道佢嘅生意頭腦真係唔錯。事關Brian Lee竟然搵到荷里活女星謝茜嘉艾芭（Jessica Alba）做拍檔，成立咗個網上售賣有機BB用品嘅公司The Honest Company；佢又同真人騷女星Kim Kardashian合作搞網上鞋店ShoeDazzle。
兩位明星嘅fans都唔少，只要佢哋喺Facebook或者Twitter宣傳一下自己間舖頭，fans就自然地乖乖走去幫襯，生意好難唔好。好似ShoeDazzle今年嘅收入就直撲一億美元（約7.8億港元），絕對唔可以睇低網店嘅吸金能力。
除咗搵明星幫手宣傳，Brian Lee都好摸得清網店嘅經營之道，好似向客戶每月發出訂購邀請；又利用電腦程式嚟分析客戶個人風格，嚟教佢哋點樣配襯出啱自己嘅style。Brian Lee咁多諗頭，唔怪得佢咁得荷里活啲明星嘅心。