絲絲講場：劉明輝蒲頭值得期待
中國燃氣（00384）早前出咗盈喜兼且股價勁升，今日正式向江東父老交代成績表，絲絲都好期待，而絲絲更加期待久未露面嘅中燃董事總經理劉明輝，今日會出嚟露吓面，話晒經過兩年嘅多事之秋，應該好多感想喎。
兩年風雨 有排佢講
中燃過去兩年，真係呢……佢同另一管理層黃勇前年底被迫暫時離開中燃，之後關於中燃嘅負面傳聞不絕，仲惹嚟同行嘅敵意收購，呢段日子都咪話唔艱難。
幸好劉總同黃總今年七月獲內地法院豁免起訴，兩人依家都已復職，中燃仲同中石化（00386）化敵為友齊齊搞合作，都可謂雨過天青咯。
以前劉總不嬲都係中燃嘅單一大股東，不過依家中燃嘅股東結構同兩年前比，已經唔同晒光景。好似尋日聯交所資料披露南韓SK又增持中燃，最新持股量已經去到15.12%，仲有同劉總拍住上嘅富地石油，加埋北控集團，計落都真係幾熱鬧。
唔知劉總會唔會講吓，點樣同咁多個大粒股東共處之道呢？
余詩韻