愛國有回報？係，絲絲話嘅，回報仲超過兩成添。唔信？絲絲講緊嘅係一班愛國嘅意大利球員。
話說上年歐債危機愈演愈烈，「歐豬國」國債嘅孳息升到危險水平，意大利就喺上年十一月廿八日搞咗個「債券日」救亡，要求銀行對買意大利國債嘅客戶免收交易手續費。無錯，即係促銷。
其中，曾經効力意甲球隊羅馬嘅意大利球員協會會長湯馬斯（Damiano Tommasi）就身體力行，除咗佢自己買入意大利國債，協會本身都有買，仲廣發邀請信畀所有職業球隊隊長，齊齊買。
湯馬斯話，佢哋希望盡己所能出分力，幫助意大利度過呢段非常艱難嘅時期。結果，班球員對政府嘅買債號召回應好積極，好似烏甸尼斯前鋒、一○年同一一年度球季嘅意甲神射手迪拿達利（Antonio Di Natale）都有捧場。更加難得嘅係，一年過後，呢項愛國舉動仲為佢帶嚟咗成26%嘅可觀回報。
其實，愛國嘅又點止意大利人，絲絲仲記得韓國人喺呢方面亦係一呼百應，喺九七亞洲金融風暴期間，韓國政府資不抵債，韓國人捐金救國，短短兩個月就籌到高達10億美元嘅黃金，成為一時佳話。