原來數碼通每年都會搞一個野外定向活動，畀員工3個人一組咁參加。
玩足三日 有得補假
個活動仲要係一連3日，咦，咪住先，禮拜六日都係得兩日假，咁參加員工咪要另外攞一日假出嚟？Stephen就話，公司係會送多日假畀佢哋。有同事就話，玩完對腳好似唔屬於自己咁，其實仲辛苦過返工。
講開運動，Stephen就停唔到口，佢原來係單車發燒友，仲話以前讀中大嗰時，成日由山腳踩上山，厲害；依家呢，晚晚都會喺屋企踩半個鐘單車機。
數碼通舊年都贊助咗個活動，啲參加者去新西蘭踩咗300公里，唔知Stephen有冇份提議嘅呢？