高層着公司tee借勢宣傳

論近期最大隻新股當然非人保(01339)莫屬,不過數到最受矚目嗰隻,翠華點都走唔甩,尋日翠華終於正式掛牌,絲絲見成間公司除咗主席李遠康外,個個管理層都着住印有「I love 翠華」嘅潮tee,對公司嘅熱誠真係「爆晒燈」!

塑膠茶餐贈港交所

上市公司首日掛牌都會同港交所(00388)「交換禮物」,而翠華出動嘅就係招牌貨——奶茶配奶油豬。不過就睇得唔食得,因為只係一set塑膠模型嚟,一眾嘉賓真係想食嘅,就要請移玉步去就近嘅中環分店喇。

茶餐文化放眼世界

公司上市,「揸弗人」李遠康自然喜上眉梢,又同記者講多次用「1314」做上市號碼有咩含義,佢話茶餐廳入邊每個崗位都係一門專業嚟,做茶餐廳係個一生一世服務市民嘅承諾。茶餐廳起源來自香港,佢已經立志要將呢個文化帶畀全世界。