絲絲講場:花旗盧韋柏升職港澳揸旗

香港又有新銀行CEO出爐,銀行界超新星之一盧韋柏(Weber)下年初起,升做花旗香港同澳門區行長及行政總裁,絲絲記得Weber喺○○年加入花旗香港做Citigold財富管理業務主管,之後用12年時間就升上去CEO個位,仲快過坐白金升降機。

P&G招數用於銀行

依家Weber仲係花旗香港同澳門嘅個人銀行業務行政總裁,下年履新之後就會唔止睇晒個人銀行業務,仲會睇埋保險、投資同商業銀行等;至於現任花旗香港區行長章晟曼,就會繼續出任花旗亞太區聯席主席。

絲絲平時同唔少banker朋友吹水時,都會提起Weber當年喺寶潔香港(P&G)做過,好識得零售客戶要幾貼心同關懷,所以做零售銀行時用番呢種心態,做得好成功,例如次次花旗出完業績都會寄封署名信,向客戶報吓喜。

當然配合埋花旗大肆擴張嘅雄心,Weber在任時,花旗喺香港發展得超快,過去3年將分行數目擴大1倍,仲要間間舖都開喺靚位。

Weber咁快就上到位,不負花旗個「銀行界少林寺」牌匾。花旗亞太區CEO卓曦文都話,任命Weber顯示佢哋栽培管理層嘅決心,寄語Weber要再加強銀行同客戶關係。