絲絲講場:潘石屹再爆復星恩仇

復星國際(00656)同SOHO中國(00410)各揸一半股權嘅上海外灘地王股權案,攪咗成年似乎都未有新進展,不過SOHO董事長潘石屹早兩日終於忍唔住要喺佢微博度爆喇。潘總話,SOHO喺收購外灘地王項目股權之前,曾經遭復星國際要求攞5億元人仔做補償,SOHO因為唔肯賠,所以先畀復星告。而復星就話自己相信法律係公正嘅,所以喺開庭前唔會作任何評論喇。

潘總話,早喺舊年四月,復星喺西安嘅合作伙伴張民耕,受復星委託去搵佢,話復星想收購上海証大(00755)同綠城中國(03900)喺外灘地王項目嘅股權,想之後就再轉讓40%俾SOHO。同年十一月,上海証大董事長戴志康透過中間人打畀潘總,話上海証大同綠城嘅資金都好緊張,問潘總想唔想收購個項目;中間人又話,之前嘅七個月,上海証大都一直同復星傾緊,可惜始終傾唔埋。

外灘項目遭索5億

到十二月潘總去搵復星董事長郭廣昌,話SOHO想收購上海証大同綠城個項目,雖然復星話歡迎,但係原來係要SOHO賠5億元人仔,潘總當然唔制,仲喺十二月廿九號公開宣布以40億元人仔買咗個項目嗰一半股權添。

復星堅持要SOHO先賠5億元人仔,理由係復星原本打算低價買項目番嚟後,再加5億元人仔賣俾SOHO。復星話明SOHO唔賠佢就告,潘總就話只好奉陪。

不過講到尾,潘總都話其實想兩家拋開恩怨,盡快從官司糾紛中走出嚟咁話喎。絲絲真係要睇吓跟住點。

余絲韻