絲絲講場:石牛倒下A股大凶兆?

絲絲聽啲北京朋友講,銀河證券北京金融街營業部,一向視門前嘅大石牛係吉祥物,但尋日隻牛失驚冇神成隻瞓低咗,佢倒地時仲將旁邊建行門口嘅玻璃打爛埋。啲網民直頭話,呢個係A股嘅大凶兆,股市唔掂仲累埋銀行。唔通尋日真係凶日?

網民話隻石牛之所以「悲壯地倒下來」,全因為隻牛終於頂唔順大盤嘅壓力而倒下,意味牛市被徹底打敗,中國股市冇得救,仲話A股可能會探底1,600點。真係講到有咁恐怖得咁恐怖。

樂觀派話牛市到

有人仲話,呢個時候應該要換番隻石熊上去。佢哋究竟係諗住攞景贈興?定係想「以毒攻毒」,靠隻石熊趕走熊市?

尋日滬指再次跌破2,000點大關,熊市氣氛持續瀰漫。不過亦有樂觀嘅網民話,「牛倒」其實同「福倒」道理一樣,正所謂「福倒、福到」,「牛倒」即係「牛到」,仲唔係天降祥瑞,寓意牛市重臨?

咁,真正嘅事主銀河證券金融街營業部又點睇?佢哋就叫大家咪鬼咁迷信,話其實係隻石牛日久失修,隻牛後腳有啲唔受力,先會跌低。佢哋已經搵咗吊車拖走隻牛,仲整緊隻新嘅大牛,大概一個星期大家就會見番門口有隻大牛啦。答得都好正路,不過,絲絲仲係覺得,寒寒哋。