資深銀行家黃遠輝（Stanley）退休之後生活寫意，今年九月更加重返校園，讀比較及公眾歷史，包括九七前後嘅香港房屋政策，加上依家有城規會同房委會公職在身，多咗評論同探討房屋政策，有時都會因利乘便，喺公開場合分享下睇法，反而少咗睇銀行界嘅事。
依家樓市、房屋、土地供應呢幾瓣都咁熱鬧，Stanley「轉型」真係十分合時，佢一向都好肯同大家分享佢嘅睇法，睇嚟以後大家多個「樓神」可以問意見。
絲絲記得Stanley身上嘅公職，至少已經有房委會資助房屋小組主席、城規會副主席、香港舞蹈團主席、同埋政府首長級薪俸及服務條件常務委員會委員，佢話退休後仲要成日開會，依家加埋要交功課，生活雖然寫意，但仍然比想像中忙碌。
Stanley喺銀行業打滾多年，佢同絲絲講，都係習慣咗一早起身，不過為咗就返學時間，佢一改以前星期六打Golf、星期日耕作嘅習慣，依家就改為星期六朝早耕作完，就下晝返學。
講到耕作，佢就向絲絲大讚近排收成嘅粟米好甜，仲話佢另外種緊椰菜同蘿蔔添，希望繼續豐收啦。早耕午讀嘅生活，絲絲都好羨慕，唔知幾時先可以有呢？