聽日係十一月嘅第4個禮拜四，對於美國同加拿大人嚟講，就係一年一度嘅感恩節，係佢哋嘅大節嚟o架，有如我哋中國人過年咁緊要。中電信（00728）繼舊年後，今年再趁感恩節，再一次請大家飲咖啡應節。
中電信出手，又點會係一般咖啡連鎖店、又或者普通茶記咖啡咁簡單！中電信今次係請大家去中環國金（IFC）嗰間由名模Amanda S開嘅舖頭歎即磨咖啡，名額一共有2,000個，幸運兒仲有機會品嘗由Amanda S親自炮製嘅「靚女Latte」添！
唔單止咁，中電信仲承諾，大家每換領一杯咖啡，公司就捐出一包兩公斤嘅白米畀「食物銀行」，即係話一共將捐出2,000包白米，相信可以幫補到2,000個有需要家庭食一個星期o架。咁有意義嘅善舉，絲絲當然鼎力支持啦。至於點樣換咖啡？絲絲畀個貼士大家：多啲睇吓報紙啦。
講開又講，中電信今年都稱得上係喜事重重，先係獲得多家外國機構頒發管理大獎，嚟緊又會推出蘋果粉絲期待已久嘅iPhone 5。
不過計絲絲話，最開心應該都係班股東，皆因董事長王曉初承諾出年有能力增加派息嘛。