絲絲講場：會公減赤收費樣樣加
今年年中接替張智媛做會計師公會行政總裁嘅丁偉銓，上場半年就有新動作！話說佢今個月初向會員發出通知，話公會截至今年六月底年度，錄得赤字八百一十萬元（一一年度錄得盈餘三百九十七萬元），為免儲備減少，所以由明年起，決定上調公會各項收費。好似會員年費咁，就由二千三百五十元，加到二千四百五十元，加幅百分之四點二五；會員首次登記費加幅更勁，由二千八百元，加到三千一百元，加幅高達百分之十點七。除咗會費外，考試費都加。
絲絲就唔係好明，會計師公會擁有成三萬幾個會員，單係每年收會費都應該收到手軟，點解會有赤字？丁偉銓向會員解釋，赤字由多個因素造成，好似為咗加強佢哋嘅專業資格課程（ＱＰ）而進行一連串活動，又要向內地推廣ＱＰ等等。
佢仲話，公會必須做啲嘢嚟避免跌入結構性赤字，所以公會理事會嘅決定係：加費。不過，公會理事會同埋管理層亦會檢討開支預算，即時削減連串支出。管理層亦會檢討吓個架構，確保人手有效運用咁話。雖然加價冇人like，但其實會計師公會過去五年都冇加過費。
周年晚宴搞「紅男綠女」
講番啲開心嘢，公會十二月三日就舉行周年晚宴，今次主題係「紅男綠女」，當晚男士要着紅色、女士就要着綠色。唔講唔知，「紅男綠女」係五十年代百老匯同倫敦好出名嘅歌劇，聽講，佢哋會用呢個故事改編成一個會計師嘅愛情故事添。絲絲等住睇。