絲絲講場：兩岸猛人登商界人物榜
臨近年尾，唔少雜誌嘅排行榜都紛紛出爐，真係睇到絲絲眼都花。好似尋日《財富》雜誌正式發布嘅「2012年度商界人物榜」，今年就有兩位華人企業家上榜喇，佢哋分別係排第24位嘅台灣鴻海集團創辦人兼董事長郭台銘，同埋排第44位嘅中石化集團（00386）董事長傅成玉。
郭台銘稱霸電子產品
今次鴻海集團董事長郭台銘之所以上榜，《財富》雜誌形容，呢家製造商，已經成為全球電子產品供應鏈上不可或缺嘅一環。因為除咗生產各款蘋果產品之外，仲有DELL嘅電腦、任天堂同Sony嘅遊戲機、Nokia手提電話等等；嚟緊仲會生產大屏幕面板向電視市場進軍，仲等緊迎接重磅產品——蘋果電視。所以郭董嘅名字出現喺榜單上，絲絲一啲都唔意外。
傅成玉能源業急先鋒
至於中石化董事長傅成玉，就畀《財富》雜誌形容為「中國能源公司進軍海外戰略嘅急先鋒」。事關過去一年，傅董不斷增持外國公司嘅股權，又計劃將開採同煉製嘅技術帶到海外市場，實行要將石油王國嘅版圖向外拓展。傅成玉呢位咁有行動力嘅企業家，「年度商界人物榜」當然唔少得佢啦。
余詩韻