絲絲講場：廖淥波離開滙豐去渣打

咁多位喺職場打滾嘅打工仔都知道，香港勞動市場嘅流動性一向好高，作為本港主要經濟動力之一嘅銀行界，當然都唔例外啦，絲絲咁多位banker朋友嘅跳槽史，真係水蛇春咁長，最近梗係要數老友廖淥波Desmond啦！

渣打（02888）當真好眼光，尋日委任咗資深銀行家Desmond，出任旗下私人銀行東北亞暨香港董事總經理及主管。喺加入渣打之前，Desmond係滙豐私人銀行北亞區主管，之前亦曾經做過星展私人銀行北亞區及大中華區主管，係私銀界嘅資深老將！

絲絲發現，近來滙豐嘅高層相繼過檔其他銀行擔任要職，就好似中銀香港（02388）資產管理主管區景麟（King），佢以前係滙豐環球資產嘅董事兼機構業務亞太區主管，佢○八年離開嘅時候，已經喺獅子行做咗超過十年。咁多銀行都喺滙豐銀行處挖角，唔通做過獅子行嘅banker係唔同啲？