絲絲講場：投資者教育今次嚟真
香港行出街個個都話投資，絲絲就好懷疑，除咗問冧巴記冧巴之外，大家對每項投資產品了解幾多？證監會就成立咗個投資者教育中心（IEC），啱啱尋日正式投入服務，聽講個中心將會推出一系列嘅投資者教育活動，話要提升大眾對金融理財知識咁話喎。呢啲嘢，總算係有心唔怕遲。
證監打本 跨界合作
呢個中心嘅架構，主席就由證監會非執董鄭國漢擔任，為期三年，仲有7位嚟自保監處、金管局、證監會、積金局、金融業界、同埋教育局嘅代表，獲委任為管治委員會嘅成員，當中包括總經理黎昊華（Miles Larbey），管治委員會係負責策略建議同埋監督嘅工作。
絲絲聽鄭國漢講，投資者教育中心會側重喺教育方面，佢哋會審視全港金融界嘅投資者教育需要，提供更多支援同保障。因為金融產品同服務，近年變得愈嚟愈複雜，甚至跨越唔同嘅業界，所以新成立嘅呢個投資者教育中心嘅工作範圍，會比證監會嘅監管範圍仲更加闊，佢哋會透過同各個監管機構合作開展各項外展計劃，針對唔同界別人士去傳遞重點訊息，加強大眾對金融投資嘅認識同風險評估，咁大家就可以作出啲有根有據嘅投資決定。
投資者教育中心嘅所有經費，全部由證監會自己畀，預計每年大概5,000萬元。中心所設嘅網站已經正式啟用，至於證監會舊有嘅「學‧投資」網站，亦係時候同大家講「拜拜」。