Market Insight：華潤置地內房首選

港股昨先升後倒跌，10日線阻力約21,387點復失之後，遇啱外圍因感恩及聖誕節前夕交投開始淡靜，今年剩下的三十個交易日，相信選擇提早收爐少做少錯的，會比臨埋數前搏命的基金要多。近期，唔少本地財金精英齊齊高調唱淡樓市，辭官轉往私募基金搵食的梁錦松，雖然認同全球印錢下，實物資產較有效抗通脹，但卻指本地樓市太貴，唔建議投資者入市，認為歐美不乏投資機會。

另一邊廂，金管局總裁陳德霖，提醒市民樓市周期唔會只升不跌，更以目前每100萬元借貸為例，目前低息期二十五年按揭每月只供4,400元，但假如套用九七年利率，供款額會大增至1.04萬元，上調空間非常大，買家要留意風險。

放大圖片

放大圖片

隔山買牛難度增

對於想上車又未夠能力的準業主，靠嚇言論確實貼近政府中心思想，特區政府先以SSD、BSD等行政手段壓市，到出口術減慢樓市升勢，目的顯而易見，就係爭取時間加快建屋步調平衡供求。可惜大環境水浸下，一條小小水壩又頂得幾耐？依家歐美官民十足十一班碌爆卡又無錢還的債仔，無得走佬之下，只能得兩個想法，一，希望債主息口上優惠一點（目前的超低息），或者本國貨幣匯價持續貶值，至少讓一批外匯收入主導的，有變相削債效果。

阿松話歐美物業市場機會多，這確是事實，但隔山買牛向來難度高，且海外物業交易及持貨成本往往遠高過香港，好難吸引精明的本地炒家全身投入。至於陳總升息論，單睇美國QE1、QE2後，畀華爾街挾上轎，整個QE無限出嚟，量寬介入容易退出難，大家過去四年時間已經睇得一清二楚，全世界熱錢無地方去，即使美、德、日、英、瑞士、加拿大十年債息唔夠2厘，依然前仆後繼，如果驚升息，或者債商比業主更要擔心。

從來樓市泡沫一開始形成，就只有事後孔明至知幾時爆，如果要搵藉口，可能中國經濟調整深度及時間都超過市場預期，會比息口回升有較大危險。

銷售目標或提高

今年內房股確實是弱市奇葩，尋日咁反覆下，仲有五隻內房股創下五十二周新高，包括龍頭股之一的華潤置地（01109），瑞信出報告唱好話潤地多得母公司華潤集團背景，在多個城市奪得興建商場地段，選址及投資潛在回報都比競爭對手好，目標價睇23.8元。

早前幾間大行都舉辦中國研討會，賓架籠統的結論，唔少認為歐美經濟暫時無大起色之下，刺激出口推動經濟的可行性，及不上重走舊路，再擴大基建、鐵路，以及適量的放寬樓市調控措施，市場估計內房股在未來陸續發表的一三年銷售目標，應不至於太過保守。

配合國策，近年潤地調整住宅發展策略，集中用家主導的中小型住宅，首十個月合同銷售418億元人民幣，目標完成度83.6%，目前唔少二三線內房交投水盡鵝飛，基金覺得內房有條件炒復甦，也未敢賭得太偏，潤地、中國海外（00688）成為必然之選，正所謂「Buy on rumor，sell on fact」，有限度鬆手之前，幾隻龍頭內房股只會愈搶愈高。

比亞迪爆發力強

尋日古勝話夠晒賣點嘅長城汽車（02333）再創五十二周高25.1元，收報24.8元，升3.12%，並帶動板塊氣氛，如吉利汽車（00175）亦同創五十二周高3.79元，華晨（01114）升0.68%；而汽車服務供應商中升控股（00881）同正通汽車（01728）亦分別升3.7%及5%。今年，汽車業有補貼政策支持，得以維持相對穩定嘅銷售表現，加上中日關係緊張，幫本土品牌一把，可以話係時勢做英雄。

展望明年，經濟復甦進度平穩，只是礙於汽車業僱用大量勞工，且出口比重日漸增加，相信只要有須要，當局會毫不猶豫推出政策扶持產業穩定發展，而短期圍繞行業嘅焦點，應該落在新能源汽車補貼政策上，比亞迪（01211）嘅爆發力亦不容忽視。

古勝