Market Insight：水泥股跟炒一轉

筆者意想不到這類禾雀亂飛的市況，竟造就港股七日及七周連升紀錄，仲創埋七個月以來最高位收市。上周五恒指唔夠70點波幅，收市升33點，報21,551點，主板成交由上周四創出個多月紀錄的709億元回落至563億元，沽空佔主板成交比例回落至7.4%，乃九月七日以來最低，諷刺是淡友開始轉軚，上周五美股卻在微軟及麥當勞等巨企季度業績欠佳下急挫超過200點，近期如取如攜的好友，今日多少亦要受到考驗。

近期港匯顯著轉強，金管局三年來首次入市，上星期主動買入美元，以免港元兌美元衝破7.75的強方兌換保證。自九月中美國推出QE3，加上歐債危機在歐央行承諾無限買入三年期以下成員國債券後暫且平伏，促使資金湧入新興市場搵食。

放大圖片

放大圖片

高息債券受追捧

上星期，新興市場股票基金錄得14.3億美元淨流入（以內地及巴西最多），儘管無香港單獨數字參考，可是近日人民幣現貨價出奇強勢，上星期創下匯改後新高（反而一年期不交收合約未有同步創新高），港元間接地受惠轉強。

可是，同○九年美國次按風暴引發資金大規模來港避險，將香港銀行體系結餘推至3,200億元以上的紀錄高位比較，今日香港銀行體系結餘只係1,533億元，論晒士同當年有距離，尤其唔少熱錢主要衝着區內高息企業債券甚至磚頭市場而來，近日差不多日日有本地上市公司發債，不過，始終餵唔飽多如恒河沙數的「好息之徒」。

舉個例，上周新奧能源（02688）尚有九年期的公司債券，炒到落3.6厘（半年前仲有6至7厘），同貸評好一截的中電（00002）剛發的10.5年債3.25厘比較，息差收窄到唔夠50點子，見微知著，個市對高息債有幾饑渴，一清二楚。如果債商無睇錯市，筆者覺得現時唔少股票吸引力比企業債高，只係大孖沙對經濟前景仍未完全轉向樂觀，由REITs股價未見調整，risk on之餘，基金經理仍然對防守股不離不棄可見一二。或者短期港股「癲鬥傻」遊戲，仲未進入高潮，個人估計，短期浪頂，較大機會在下月初至月中，十八大前後出現。

細價股靜極思動

熱錢湧港，魚缸自必得益。上周五美股低收，加埋聽日又係假期休市，話唔定今日初段恒指會先回回氣，但經驗告知，短線指數抖氣，資金多半會轉攻與指數冇大關係嘅二、三線股。好似上周開始見到一啲蟹貨甚多、股價低殘嘅細價股成功突圍而上，典型例子係國美電器（00493）及保利協鑫（03800），若然短線呢啲股份繼續向上，相信陸續有其他細價股靜極思動，搵啱對象食正頭啖湯都幾回味。中投三寶中，保利協鑫已起動，不妨睇實另外兩隻──中芯（00981）同旭光（00067）。

水泥業絕對是今浪浴火重生的鳳凰股，龍頭安徽海螺（00914）由八月底反彈42%，華潤水泥（01313）更升達54%，如把握到今次升浪，今年或者已經可以提早收爐。不過，由八月份水泥股的成交可見，試問有幾多人夠膽在八月水泥價格低點，賣一包蝕一包的情況之下，買水泥股咁有guts？

行業見底待觀察

事實上，內地九月份水泥價格的確有超過一成反彈，可是需求量增長唔算大。上半年內地水泥行業設備使用率只有65至70%，低於80%以上正常水平，水泥業經過今次小陽春後，明年情況能否改善，仍是有待觀察。

但講到明癲鬥傻，尤其筆者也只以兩至三個星期為目標，水泥股升浪由一線擴散到二線股的可能，仲係未可抹殺。海螺及潤泥市帳率分別回升至2.6及1.8倍，唔平，再數落去市值有番咁上下的，包括西部水泥（02233）及金隅（02009）的1.2倍，再冷門嘅選擇，有0.5倍的天瑞水泥（01252）以及台泥（01136），只能揀兩隻落注的話，「暫時」市值唔到10億美元的西泥及台泥，可以博股價再升之後，基金要焗跟。

古勝