絲絲講場:葉茂林教仔女街訪練口才

依家香港嘅大學生愈嚟愈多,點樣先可以突圍而出?耀才證券(01428)主席葉茂林就分享咗自己教育仔女嘅心得,放諸四海皆準咁話。佢話最緊要係口才了得,懂得sell人,先夠煞食喎。

佢笑言自己屬於「嚴」嗰類,仔女細細個就畀佢推到街頭做訪問。葉生講,「生行街,死掌櫃」嘛,做Sales(推銷)嘅靠把口賺錢,傾得成大額交易嘅話,分佣可以好和味。

港股低水 唔入市就遲

相反,做後勤掌櫃嘅日篤夜篤都係呢份工,發展空間未必咁大,所以我會隨意諗啲題目,畀仔女們做吓街訪,訓練吓佢哋點樣同人溝通,畢竟我自己年輕時都係做Sales出身嘛!

既然同葉生傾偈,當然要問吓佢點睇市況啦。佢話同本地樓價比,依家港股仲係低水,入市贏面大過輸面,仲反問依家唔入市,唔通要等恒指升番上3萬點先買?佢特別睇好嘅係本地地產股同內銀股,相信如無意外都係升市功臣之一。