絲絲講場:普爾遜原來係樓神

喺美國人永遠唔會忘記嘅次按風暴中勁賺嘅「賺錢之神」普爾遜(John Paulson),○七年貼中樓市泡沫,勁沽次按債券而勁賺40億美元。但係,其實市場都走漏咗眼,原來佢除咗沽空伎倆超卓外,都係樓神嚟嘅。

絲絲記得兩年前,佢曾經喺大學演講時話睇好樓市,仲公開話邊個冇樓揸手嘅就快快上車,有樓揸手嘅就再買多層,總之磚頭在手,包無失手咁話。誰知佢嘅「撐樓市論」好快就累人蝕錢,據來自對沖基金消息,上年華爾街嘅富豪就因為「誤信」普爾遜嘅買樓言論,結果就喺樓市慘蝕30億美元!不過,絲絲唔覺普爾遜擔心自己睇錯市,皆因啲富豪炒樓炒燶晒嗰陣,普爾遜擁有嘅淨資產就高達110億美元,而佢亦繼續大手筆咁買樓投資。

揸頂級筍盤抗跌

好似今年六月,佢就向蘇丹王子買入一個位於Aspen嘅牧場連住宅物業,佔地共128英畝,有十五間睡房,仲有泳池、網球場、蒸氣房等等。地產經紀都話呢個係絕對筍盤!

話說呢個超級豪宅○六年時叫價1.35億美元,不過普爾遜就拎咗個特大優惠,只係用4,900萬美元就買咗呢個筍盤,計落足足賺超過一半!