絲絲講場:吳亞軍保女首富

經濟唔好,身家大縮水,最正面受到衝擊嘅梗係啲富豪啦,就連四叔前幾日都話要追番先前投資蝕咗嘅先至安心退休享清福!今年內地經濟唔多掂,喺最新公布嘅《2012胡潤女富豪榜》就證明咗呢一點,龍湖地產(00960)董事長吳亞軍雖然蟬聯中國女首富,但唔淨止得佢,連同其他女富豪,實情普遍身家都縮咗水!

吳亞軍坐擁380億(人民幣‧下同)排頭位,佢同時亦都奪得全球白手興家嘅女富豪榜首位,不過相比起舊年身家420億,副身家就縮水10%,少咗成40億!緊隨其後嘅係富華集團陳麗華,坐擁340億,升咗3巴仙(真係奇葩)!

至於曾做過兩屆中國女首富嘅碧桂園(02007)楊惠妍就以330億屈居第三,雅居樂(03383)嘅陸倩芳同老公陳卓林以215億排第四;曾奪三連冠嘅玖龍紙業(02689)張茵則以200億排第五,身家跌超過28%,SOHO中國嘅張欣身家亦跌咗近兩成,得番170億,排第六。

女富豪兩成搞地產

喺百富榜嘅50位女富豪之中,佢哋平均財富得88億人仔,比舊年少咗差唔多一成,總財富就總共有4,406億,亦都少咗大約8%。

上榜嘅女富豪好多都係做房地產,佔比達22%,包括頭四位都係,但比例就比舊年少咗2個百分點,而第二類造就富豪行業係金融與投資,佔17%,增加3個百分點。絲絲睇完之後,都不得不嘆一句「成也內房,敗也內房」囉!

余詩韻