孖妹S檔案:證券行招牌 逐個古仔講

作家張愛玲講過:「成名要趁早。」孖妹市儈啲,將呢句話詮釋為:「成名愈早,賺錢愈早。」但點樣先可以「成名」?先改個「絕世好名」囉!講真,本港樓價勁升,都係全靠啲樓盤名改得好,如瓏門、御皇庭等!間間豪宅名都咁尊貴,真係住咗入去都即刻變皇帝王后喇!不過孖妹靠炒股搵食,反而有興趣知道本地「魚缸」嘅名字由來?究竟係咪名字愈富貴,就愈多散戶幫襯?

俗語都有話:「唔怕生壞命,最怕改壞名。」好多明星未入行之前,通常都會搵「高人」幫手改番個「鴻運當頭」嘅藝名,務求演藝生涯順風順水,名利雙收。(正如劉德華個名都係藝名,佢真名叫劉福榮嘛!)

因此,孖妹作為散戶,對於揀邊間「魚缸」以實現富貴大計,都非常有要求o架!除咗個名夠旺財之餘,樣靚(證券行裝修)、身材(公司實力)都好重要。所以你都咪話散戶錢易賺呀!而以下就係本地幾間證券行嘅「成名」故事,話唔定當中就有你哋幫襯緊嘅嗰間。

孖妹發問

Q1:點解當年證券行決定改呢個名做生意?

Q2:呢個代表證券行嘅Logo(標誌),到底有咩特別意思?

耀才:堅守公平 冀破黑暗

A1:「喺八十至九十年代,股票市場都幾黑暗,亦有不少老鼠倉活動,所以我搞證券行時,一來希望幫客戶搵大財、發大達;第二就係希望改變業內市場嘅黑暗面,堅守做生意要光明正大、光明磊落。於是我就沿住呢兩個重要理念出發去改名,後來我諗到,有才幹就自然能夠生財;而生財就會令生意愈做愈大,最後既可以光宗耀祖,亦可以耀武揚威。就係咁樣,最後我就推敲出耀才呢個名喇,本來我諗住用個『財』字嘅,但費事畀人感覺太市儈喇,所以我就改為用『才』字。」

A2:「我做生意嘅宗旨、原則,就係連一毫子都唔會呃個客人,所以你見到公司Logo是個天秤,意指公司與客戶之間嘅關係、生意均要公平、公開、公正。我相信,以呢個態度去做生意,生意先會長做長有,呃呃騙騙所賺到嘅,永遠都係啲過眼雲煙嘅錢。而顏色都有意思,底層採用白色,意指光明;而紅色就係代表中國、喜慶、旺財之意。」

解謎者:耀才證券主席 葉茂林

一中:概念鮮明 擁護祖國

A1:「作為中國人,本身一定擁有民族意識,一中即係一個中國嘅意思,英文名亦直接用One China。呢間公司包括我在內,共有五個老闆,大家本身在金融圈內有人脈亦有經驗,故在○四年五個人決定一起創業。當時,我哋已經預示到未來中國經濟嘅發展迅速與機遇,公司嘅營運版圖亦希望能擴至內地,所以最後以一中為名,既有中國人嘅根本價值,同時表示出投資中國嘅鮮明立場。」

A2:「Logo由英文字母O和C結合而成,即One China。O字亦代表圓圈,圈內有一顆星星,分別出現五隻角,意指我哋五個人一起手牽手創業,彼此團結而且無任何缺損。而隱含O字並從中延伸出來嘅C字,就有開放之意,即接納意見、吸收資訊、吸納人才等意思。顏色方面,主要都是沿用中國國旗那隻紅色。」

解謎者:一中證券董事總經理 彭啟明

訊匯:迎合時代 融入風水

A1:「訊匯未改名之前係叫做謝氏金融集團,直至一九九九年尾,環球金融市況開始展現瞬息萬變嘅一面,令謝老闆感到公司亦須與時並進,加上謝氏金融集團呢個名比較老土,於是謝老闆決意為公司重新改名,一來可以建立專業形象,二來亦是配合當時嘅市場變化與發展。咁由於謝老闆亦都篤信風水命理,所以選擇名稱時嘅筆畫都有考慮到配合五行因素,最終就揀出「訊」、「匯」二字,前者意思就係資訊發達,後者則為匯聚資金。你知喇,做金融行業,最緊要就係最快掌握第一手市場資訊,以及匯聚大量資金,生意先能夠愈做愈大嘛!」

A2:「之前講咗,謝老闆向來篤信命理,因此設計公司標誌時,亦有配合五行因素。Logo有圓有方,取其形象,貌似八卦,亦似銅錢,形象上顯得十分立體。顏色方面,之前Logo是黃色、藍色,但早年就改為紅色和白色,感覺會比較專業性,而且更容易讓人留下深刻印象。」

解謎者:訊匯證券行政總裁 沈振盈

信誠:信字行先 建立聲譽

A1:「其實劉老闆改呢個公司名嘅意思十分簡單,背後嘅最大宗旨就是『待客以信,服務摰誠』。由於八十年代時期,本港金融市場比較混亂,市場上經常都有老鼠倉活動出現,散戶對於銀行經營嘅信心,往往比證券行為大。有見及此,劉老闆希望重建散戶對於證券行嘅信心,於是決心堅持證券行嘅經營風格要穩健、務實,英文名亦採用Prudential,再次表達審慎和細心之意。」

A2:「至於Logo嘅設計故事就值得一講,因為設計者就係信誠嘅客戶,話說當年公司搞咗個活動,邀請不少客戶為公司設計Logo,最後經過一輪精挑細選,就揀咗呢個由方塊結合而成嘅P字,即Prudential咁解。至於顏色方面,就應該無咩特別意思嘅!據我所知,當年呢個活動屬於遊戲性質,最後呢名客戶都有得到豐富獎品o架!」

解謎者:信誠證券聯席董事 張智威

彩兒:聽完呢幾位解謎者嘅現身說法,我發現每間證券行果然都係「名不虛傳」,每個名字背後都充滿血肉和抱負。

高妹:本來仲可以搵多幾間證券行去問吓,可惜老闆們都係大忙人!

高妹&彩兒