Software巨人微軟正式向死敵Apple低頭，CEO保曼喺年度股東信入面，講到明展望微軟業務愈嚟愈似Apple，集中火力喺hardware同埋網上服務產品，話係公司新方向，其實佢唔講大家都睇到微軟「蘋果化」，近期推出平板電腦Surface，又搞緊雲端服務，即係話遲吓出埋智能手機。不過，保曼近年表現唔爭氣，今年仲畀公司減花紅差唔多一成！
保曼話，仲會繼續同硬件夥伴戴爾、三星同埋宏達（HTC）合作，但強調微軟嘅產品「生態系統」變緊，而且係重大嘅轉變。
PC作業系統視窗（Windows）賣得麻麻哋，又做唔到早前同歐洲監管方面傾好咗，向用家提供瀏覽器選擇，微軟惟有向保曼啲花紅開刀，監管文件顯示佢本年度袋少咗9%，得番62萬美金，連續第三年攞唔到最高花紅，即係相當於人工兩倍嘅水平。
另一邊廂，微軟創辦人蓋茨講到明，話唔會好似已故蘋果教主喬布斯返去幫手，睇嚟追唔切幫微軟轉型嘅保曼，真係要好自為之！