金融大鱷索羅斯駐港四大元老之一蔡篤昀真係離咗巢！索羅斯在港基金公司SFM HK Management嘅負責人已經得番三位元老，即係戴霽昕、James Chang同埋SCHABEL Walter Friedrich，市場亦傳SFM暫時唔會點搞大香港業務。
索羅斯基金發言人Michael Vachon早排先同絲絲講，Robert Tsai（蔡篤昀洋名）仲係公司僱員，當時證監會登記顯示，Robert○五年三月二十三日起，係SFM HK Management僱員兼負責人。
但有老友尋日提醒絲絲，話Robert真係走咗，絲絲查番證監資料，發現Robert十月開始，身份變咗「沒有主事人，不准從事受規管活動」，證明佢真係離開咗索老，據聞目前都仲未有着落，所以未向證監會登記。
Robert離巢消息年初傳到依家，先排傳出拉隊走人，仲話六月開始將佢管理嘅10億美元基金平倉結算，依家證明係堅料，相信佢九月底前埋晒數同索老講拜拜。
市場亦有傳身為台灣人嘅Robert畀一個台灣金融集團傾緊自組投資公司，中港及大中華區由佢打骰，但依家就似乎仲未成事。