絲絲講場：華潤宋林趁出差扶貧
華潤集團近年業務行多元化路線，市場印象最深係佢哋嘅啤酒、飲品業務。最近佢哋投資咗超過26億元人民幣，為華潤雪花啤酒及怡寶水飲品而設嘅「雙百萬噸項目」廠房，終於喺安徽六安市開工大吉，董事長宋林親自去主持開幕儀式，老友仲爆料，話宋總趁出差，去咗扶貧。
傾希望小鎮搞產業
安徽金寨縣原來有個叫「華潤希望小鎮」嘅項目做緊，概念係華潤喺○八年提出，目的唔單止係幫助貧困地區嘅農民脫貧咁簡單，而係扶助希望小鎮嘅產業，同集團相關嘅產業中心進行緊密結合，概念似足啲企業成日講嘅協同效應。
選址方面就更加講究，作為國企公司嘅華潤決定挑選革命老區縣開展扶貧工作。
經過幾年努力，華潤先後喺多個革命老區，建成希望小鎮。
宋林今次帶隊去到金寨，就同當地嘅幹部同群眾代表傾希望小鎮嘅產業發展模式，同埋小鎮建設改造等議題。
講到尾，宋總嘅「時間管理」認真做得好，去個trip，又出差又扶貧，時間同金錢都慳到。
余詩韻