姚巨人話「要投就投中國人壽！」一句口號，已經表現出龍頭大佬嘅氣勢。中國人壽（02628）身為國有保險公司，已經贏在起跑線上，佔據着市場份額三成。但呢幾年股價都表現麻麻哋，好在第二季業績開始見到改善，管理層嘅努力總算無白費，無辜負到一班粉絲嘅愛戴。
國壽嘅保費收入放緩，公司解畫話主要受到宏觀經濟環境、銀行保險監管政策嘅影響、銀行理財產品等金融產品嘅衝擊。但Prof. J就有所保留，因為睇番佢嘅報表，發現經銀行保險渠道銷售產品退保金額增加咗、保費收入降低，但反觀經代理人銷售嘅個險渠道卻因續保保費收入顯著改善而有所增長。問題應該出喺銀保身上，因為理財同保障本來就係兩個截然不同概念，並唔應該係競爭對手。
經銀行銷售，雖然網絡大，但相對保險嘅專業知識較弱，並唔能夠有效咁傳遞買保險係買保障嘅概念。結果將保險當成理財產品來銷售，那退保嘅壓力一定會有。因此專業嘅保險從業員團隊對保險公司業務穩健性擔當着很重要角色。Prof. J認為短期產品比較適合經銀保渠道銷售，而長期產品如壽險就較適合由從業員去跟進。
當然，國壽梗係知道問題所在啦，所以見到佢都發展緊新業務：一啲短期產品同醫療保險，仲持續取得理想表現添。不過，有辣有唔辣，短期產品亦令賠付支出增長咗。除咗加強產品創新，國壽嘅業務重點進一步由銀保轉移至個險渠道，Prof. J相信渠道嘅轉型發展會加快推進。繼續追蹤，出發！
香港大學電子金融服務榮譽助理教授 徐燦傑