西班牙呢幾日又成為「債務危機」風眼，咁啱和黃（00013）喺巴塞隆拿投資嘅巴塞南歐碼頭（BEST）開幕，難得西班牙有大投資呢單喜事「沖喜」吓，就連西班牙國王卡洛斯都出席，算係喺當地一片混亂境況下，緩和一下反政府情緒。
西班牙政府面對當前嘅經濟困局，要堅持開展大型嘅碼頭基建項目，確係一啲都唔容易，而西班牙國王今次親自主持BEST嘅開幕，明顯反映政府「開心都嚟唔切」。
絲絲都有份去開幕禮，碼頭規模固然龐大，唔講唔知，原來當中蘊含科技大突破。呢個突破，絲絲真係唔識，要請教和黃旗下和記港口嘅集團董事總經理馬德富至搞得掂，佢話BEST係集團旗下首個嘅半自動深水碼頭，對港口業務嘅發展有重要啟示作用。
咁究竟乜叫「半自動化深水碼頭」呢？簡單嚟講，就係貨車只需將貨櫃送到BEST嘅外圍，電腦系統就會自動將貨櫃送入堆場，再安排岸邊吊機將貨櫃送上貨輪，從而慳番將貨櫃由碼頭閘口送到岸邊同貨輪嘅人手，有助減輕營運成本提高競爭力。呢個突破對和黃梗係好啦，不過，西班牙失業率咁高，佢哋可能情願唔好咁自動化，請多啲人啦！
余詩韻