Market Insight：粵投買定看門口

港股昨日主板成交增加至514億元，除基金第三季結前出多兩錢肉緊，粉飾櫥窗之外，古勝覺得實在無第二個更合理嘅理由，支持好友們咁鬼高興。今年內地黃金周有八日長假期，儘管來港水貨客少咗，預計都會過百萬人次訪港，未來幾日最好少去旺角、銅鑼灣等逼人之地為宜。

零售股走勢麻麻，六福（00590）、周生生（00116）、景福（00280）、莎莎（00178）及卓悅（00653）逆市偏軟，幾隻珠寶股炒金價反彈，從低位反彈唔少，短期回吐正常，反而濠賭股近日走勢堅挺，大行對澳門九、十月博彩收入看好，短炒不妨諗吓由零售換貨至濠賭股。

放大圖片

放大圖片

放水效果未符期望

歐洲央行無限量買入三年樓下歐債，美國聯儲局推QE3掃入MBS（按揭抵押債券），環球經濟即使未見起色，可是，財金決策者水浸全球之外，仲係諗唔出更有效的辦法。目前情況，有啲似食止痛藥上癮的病人一樣，愈食劑量愈大，止痛作用反而愈低。

君可見全球央行大開水喉，股市也只係威得一兩日，商品市場更同QE1、QE2時唔同，油價反高潮由100美元撻落90美元水平，金價衝上1,790美元水平後，也顯得無以為繼，唯獨長債，初時以為美國買MBS唔買長債，十年美債跌一日之後，幾乎日日升，孳息率由1.9厘碌番落1.6厘，一葉知秋，金融市場預計未來環球經濟前景麻麻，通縮比通脹風險大。

睇番港股，如果是上兩次QE，基金經理勢必狂隊REITs、公用及高息股，risk on炒番落後價殘的股份。今次完全唔見咁嘅情況，反而近期一些企業及銀行的高息債券，升幅甚至高於股票，在在反映芬佬眼中，經濟即使離開深切治療部，但距離出院仲有相當漫長嘅日子。

東江水充當現金牛

不過，唔係任何高息投資都咁搶手，好似專攻鋁材製品的中國宏橋（01378），周三籌組3億美元債券，出到11厘樓上，最終昨日宣布反應一般而告吹。另外，收購廣州IFC文件中，越秀房託（00405）最初希望以不會低於3.56元配股集資，結果前日批3.3元，集資額亦比目標細，只好向銀行融資方面打主意，在在反映市場對內地商用物業租務市場傾向審慎。昨日越秀房託股價雖然低開高收，接貨者表面勁賺11%，要留意今次以T+5形式結算，接貨者等到下月八日先正式收貨，到時乜環境真係睇唔透，無平貨在手，睇怕不宜貿貿然摸入去。

有人辭官歸故里，有人漏夜趕科場，剛被投行高盛除出確信買入名單的粵投（00270），昨日被美銀美林出報告唱好，認為揸住東江水項目的現金牛，每年坐擁22億自由現金流，加上本身低財務桿槓得15%，派息有保證，股價仲未反映收購資產提升收入的可能，目標價睇7.1元。

回顧年初至今，粵投股價累積升幅27%，以綜合預測一三年每股派息20.2仙，股息率3.37厘，睇番○九年至今，粵投歷史股息率在2.5至4.1厘之間徘徊，目前不算太貴，未買者不妨等機會，5.8至5.9元會更吸引，至於有貨的，暫時實在看不到要沽掉的理由。

內銀股未宜太樂觀

昨日市場盛傳中證監會召開記者會交代暫停新股發行等維穩措施，但A股收市前經已被官方否認。其實個幾月前市場亦曾出現類似嘅傳言，結果一樣係「流」料，之後A股疲弱依舊。相信大戶為咗季結刻意發放所謂嘅利好消息，投資者宜小心應對，以免誤信傳言入市接火棒。

板塊方面，昨日內銀股普遍隨大市上升，下周A股休市冇咗指標，唔排除班大帝又乘機做嘢，但古勝認為，內銀股基本因素未有大改善，A股喺長假去向未明，內銀股表現未許樂觀，短炒相關衍生工具宜注意風險水平。

古勝