Market Insight：海爾有條件跑出

內地出口製造業不振，投資氣氛薄弱，資金鏈斷裂未解決，受制於通脹及樓市調控隨時死灰復燃，人民銀行遲遲未能以具規模減息行動刺激經濟，中美股市強弱懸殊，形成強烈反差。

經濟背靠祖國，但剔除「紅色成分」，今年港股本身表現其實唔算太差。MSCI香港指數年初至今升幅17%，高於MSCI中國5%的升幅，皆因非中字派，查實唔少受惠於美國超低息環境，好似本地地產股及一眾銀行股，短期抗衰退力較預期好的濠賭股，也成了上半年基金避險首選。今年中資股及內地A股走勢差勁，遠遠落後外圍股市，主要係投資者對內地企業盈利倒退，悲觀預期無限放大。

放大圖片

放大圖片

淡友暫仍佔上風

不過，由財政部公布一至八月國企累計利潤總額1.379萬億元人民幣，按年倒退12.8%，當中經過七個月倒退，八月份按月反彈1.1%，意外是A股不為所動，內地投資者對股市心死，比不少人估計更嚴重。古勝預期，十八大前的政治不明朗因素下，淡友會佔到上風，惟可以肯定，刻下加入睇淡，確實是後知後覺之舉。

昨日港股下跌56點報20,601點，主板成交508億元，昨日是「918事變」八十一周年，中日就釣魚島主權爭議全面升溫，內地的反日示威愈演愈烈，由電視新聞所見民眾唔單止大肆破壞日本品牌汽車及商店，甚至無關事的非日資商店，一樣遭到搶掠，食肆要貼上中國國旗表明愛國情操，才幸免於難！令人擔心係，示威開始變質，變成把對社會現狀的不滿，透過今次中日爭端爆發，釀成一輪社會危機。

阿媽收購有好處

針對反日示威浪潮，瑞銀出報告話，向味千（00538）及華地國際（01700）管理層證實，的確有分店遭破壞，預料影響也會持續，短期內，非日系受惠者包括海爾電器（01169）、小南國（03666）、聯華超市（00980）、高鑫（06808），以及美國上市經營肯德基炸雞的Yum！Brands。

真係唔知有幾多人會誇張到將自己屋企部日本牌子洗衣機或者雪櫃打爛，買部國貨取而代之。不過，海爾又確實是近期值得留意股份之一，今年其母公司海爾集團，先是收購日本三洋的洗衣機及雪櫃業務，拓展日本及國際市場，最近，又再睇中新西蘭家用電器製造商龍頭Fisher & Paykel（F&P），以總代價8.69億紐元，將這中高檔電器品牌收歸旗下。

兩個收購，相信注入香港上市的海爾電器機會唔大，反而分析員着眼是涉及的專利技術轉移，以及未來轉往內地分銷的好處，對海爾長遠發展之好處。年初海爾電器由7元起步，二月高見10.34元之後，其股價主要在8至10元之間浮沉，市場估計主攻三四線城市分銷的業務，區內收入改善幅度高於一線城市，今浪受經濟調整衝擊比較細，估計今年盈利有23%增長，現價8.99元，一二年市盈率9.8倍，阿媽兩次收購未有影響其股價，古勝認為現價上升潛力，會大於可能出現的調整。

房企點石成金？

昨日市場焦點之一係一批被內地企業入主嘅殼股熱炒。事緣近期獲中糧香港入主嘅僑福（00207）炒到甩轆，前日拉閘嘅星獅（00535）傳聞被內地四大上市房企之一嘅金地睇中，屬實嘅話復牌又要喪炒一轉。此外，呢轉一直跟住隻僑福炒上嘅股份，仲有獲萬科入主嘅南聯地產（01036）同獲招商地產入主嘅東力實業（00978），就連前年獲遠洋地產（03377）入主嘅盛洋（00174）都趁熱鬧，急升52%。

總而言之，中央唔肯放鬆內房調控，班房企眼見唔少企業喺香港進行人民幣融資，索性走出內地，喺港股買殼建立融資平台。

目前內地四大上市房企──招商地產、萬科、保利、金地，都經已喺港股插旗，一個新板塊逐漸形成。呢批股份炒作焦點唔係內房概念，而係注資概念，手法不離炒高股價，谷大個殼嘅市值，再逐步注入資產，期間批盪當然唔少得，但最終股價係咪獲得支持，就要睇注入嘅資產有幾堅！

古勝