內地開廠嘅，呢兩年呻到樹葉都甩，人民幣同工資勁升，企業盈利就好難升。飛達帽業（01100）副主席顏顏寶鈴（顏太）絞盡腦汁慳錢，度咗幾條橋，最新嗰條橋就係叫做「家屬支援團隊」喇。
「家屬支援團隊」顧名思義就係全家總動員做嘢，但飛達只需要養一個長工，其他家屬只會係解「燃眉之急」嘅兼職，一旦有急單，就叫個員工call晒一家大細開工，顏太話一來公司唔使養咁多人，二來啲家庭可以有啲額外幫補，又可以多啲時間見面，一舉多得咁話。
飛達近年都逐漸將啲產能搬去孟加拉咁遠，不過顏太話始終高檔產品嘅生產線都留番喺內地，所以要度橋搞掂工人供應充足，但又唔太加重公司負擔。
顏太仲講，依家完全唔擔心冇訂單，反而係自己產能唔夠而推咗部分單，所以公司有計劃喺湖北起間新廠，遲啲仲帶埋生產線嘅主管上去視察。絲絲一向都知道顏太親力親為，而最近公司委任咗個營運總監，顏太話自己有佢哋幫手，終於可以輕鬆啲，多啲時間同顏生去吓旅行，歎吓世界先！