絲絲講場:三星主席拜訪超人

三星電子同蘋果公司(Apple Inc)近年鬥到難分難解,香港嘅戰場尤為激烈,三星主席李健熙近日嚟咗香港,仲同長和系主席李嘉誠,同埋大仔李澤鉅會面,表明有意進一步加強雙方嘅業務合作,亞洲兩大企業巨頭嘅世紀會面,引來大家嘅關注!

合作機會遠超電訊

三星嘅手機全球大賣,和黃(00013)旗下嘅3英國,早前又同三星簽訂咗4G基站嘅供應合約,加上和黃亦係國際電訊業嘅投資巨頭,大家即刻聯想到電訊範疇嘅合作,但南韓嘅媒體就有另一番理解,認為李健熙同李嘉誠,除咗電訊相關嘅業務合作外,亦涉及三星系內嘅電機工程、港口以至水處理技術嘅潛在合作機遇。

據絲絲八到,李健熙喺周一坐專機嚟香港,南韓商界已經猜測,佢一定會拜會重量級嘅商界領袖,再加上長和系多年來同三星嘅主要對手LG亦有深厚嘅業務合作關係,二人今次嘅世紀會面自然引起市場迴響。之不過,電訊界uncle提醒絲絲,三星同和黃其實合作過o架,事關和黃2G年代嗰陣喺本港同澳洲大力發展CDMA,就使三星嘅手機成功走向世界舞台,依家去到4G年代,兩大巨頭合作唔係冇可能!

余詩韻