好多富豪冇將公司上市，就係唔想人哋成日計住佢哋嘅身家。係人都知娃哈哈創辦人宗慶后係超級有錢佬，但冇人知佢準確嘅身家數字，所以啲乜榜物榜，計出嚟條數相距好遠。點知娃哈哈發言人尚奇寧爆咗響口，話宗慶后嘅身家有216億元（美元‧下同），多得佢呢番話，宗慶后即刻榮升為中國第一首富。
身為中國第三大飲料製作商嘅董事長，宗慶后嘅財力唔嘢小，但未公布佢喺娃哈哈所持有嘅股份之前，佢嘅身家被人低估咗好多。根據彭博社億萬富豪指數，現時持有超過80%娃哈哈股份嘅宗慶后，佢嘅總資產比全國最大搜尋器百度嘅創辦人李彥宏仲要多。
根據胡潤同埋福布斯嘅富豪榜，宗慶后同李彥宏嘅排名好唔同，胡潤話宗慶后威過李彥宏，福布斯就啱啱相反。有咗尚奇寧提供嘅資料，遲啲個排名應該唔會差咁遠。
宗慶后能夠如此成功，全因娃哈哈定位清晰，而且入咗一個啱嘅行業。係二○一一年，娃哈哈嘅收入高達110億元，賺咗10億元。宗慶后表示，因為中國政府大力推動內需，佢預計二○一二年嘅營業額可以去到133億元，淨收入就有16億元。