絲絲講場:永隆鄺國榮搵蘇軾抗逆

雖說人生不如意事十常八九,但畀你遇着逆境,都會手足無措。永隆銀行司庫鄺國榮(Frankie)深明呢個道理,於是請咗個資深傳媒人搞培訓,以蘇軾嘅經典大作探討面對逆境之道,仲順便勉勵「九十後」要有上進心!

勉勵年輕人上進

Frankie素來對研究宋詞甚有興趣,席間仲分享咗《水調歌頭》、《定風波》、《初到黃州》、《臨江仙》等等。

佢話蘇軾嘅詩詞當中,可以睇到呢位三起三落嘅大文豪,點樣喺被貶時,笑對逆境。聽講,呢次培訓好受歡迎,皆因大家都想提升自己嘅軟實力,減輕事業上、生活上嘅壓力!

除培養一班管理層嘅EQ,Frankie仲教點同「九十後」相處。但提起呢班後浪,Frankie就話佢哋嘅工作態度同一班舊人唔太一樣,仲勉勵佢哋要有上進心,否則十年後回首,會發現自己原地踏步,到時後悔莫及呀!

余詩韻