絲絲講場:利豐有德銀雪中送炭

利豐(00494)自從交出令市場相當「驚嚇」嘅中期業績後,好多券商都老實不客氣,快手「轉軚」降佢評級兼削減目標價,絲絲得以見證利豐股價歷史性急挫19.27%、市值單日蒸發超過257億元嘅一刻,其後證券行冇手軟,連續出咗好多份唱淡報告,真係冇日安寧,唔怪之得佢奪得八月份嘅藍籌股價表現包尾獎。

瑞銀法巴愈踩愈殘

尋日證券行又發功喇,之不過,有份調低利豐評級嘅德銀原來有兩手準備,轉頭又趁利豐低位增持,明顯對利豐「一往情深」。

績後利豐嘅股價已一落千丈,足足跌近四分之一,最近仲連跌三個交易日,雖然話出口環境麻麻拖累利豐前景,但係瑞銀消費股分析員梁裕昌(Spencer)「咁啱」又喺上周五發功唱淡利豐,估計利豐今年集資五億美元後,家陣手頭現金仍然「掹掹緊」,未來半年有機會再向市場伸手「度水」,結果有乜辦法唔令利豐股價插水呀。法巴都加多腳,給予「減持」評級 ,目標價10.1元。

但原來德銀暗地裏依然投利豐信任一票,八月廿四日好勇咁以每股平均價12.921元入市增持利豐近1,088萬股,攞成1.4億元「雪中送炭」,可惜尋日利豐股價仲未見起色,繼續跑輸大市,跌2.93%至11.92元。

余詩韻