絲絲講場：「入廠」傳聞炒起鎮科

鎮科集團（00859）上個禮拜一股價突然爆升七成七，本來上市公司有好消息股價爆升好正常啫，奇就奇在嗰日嘅傳聞其實冇咩好慶賀，傳聞居然話係公司嘅創辦人兼主席吳鎮科因病入院，仲話市場炒鎮科賣盤憧憬，所以股價先至升得咁勁喎。如果股價升真係「趁佢病」，唔知吳生會點諗呢！

鎮科集團尋日就發公告澄清，話主席吳生依家身體仲好健康，之前話入咗廠嘅傳聞只係謠言嚟啫。其實呢單傳聞之前，鎮科股份好多時都冇咩成交，但嗰日股價同成交簡直互相配合，個價依家雖然回番啲，但都係高過之前好多。鎮科份澄清公告係尋日收市後發出嘅，下個禮拜返嚟就知股價有咩反應嘞！

不過絲絲都覺得，鎮科今次嘅澄清都出得幾遲，吳生嘅健康既然無咩問題，就應該及早出嚟同大家講，無謂要大家「擔心」啦！

余詩韻