絲絲講場：輸官司 三星二手機沽壓重
上星期蘋果公司同南韓三星（Samsung）喺美國嘅侵權官司終於有判決，三星被裁定侵害蘋果六項專利，要賠償十點五億美元。正當外界擔心三星嘅前景時，一班Samaung機主已先行跳船，一窩蜂拋售手上嘅智能手機。
外圍舊機價跌一成
以外國有名嘅手機轉售網站Gazelle.com為例，單單過去幾日，放售三星智能手機嘅交易已經上升咗五成。因為市場供應多咗，連帶二手價都跌咗一成；就連Gazelle.com嘅發言人都話，拋售潮會持續一段時間。有專家分析指，消費者都擔心新一代三星手機會同現時嘅設計有好大分別，慣用嘅界面同功能將會消失，所以都紛紛轉售現有嘅手機。
絲絲仲知道，蘋果啱啱入稟法院要永久喺美國禁售三星嘅七款智能手機同一款平板電腦，案件決定咗今年十二月六日開審。又要賠錢，又可能被禁售產品，睇嚟三星都要經歷一段艱難嘅時期。不過，聽聞三星已經準備好賠償，佢哋將三十架裝滿五分美元硬幣嘅貨車駛到蘋果公司門口，話嗰三十車硬幣就係賠償喎！你哋唔使咁驚訝，呢個消息只係絲絲喺微博睇到，係網民無傷大雅嘅玩笑咋。至於真正嘅賠款，十零億美元對三星嚟講，真係濕濕碎嗰隻，佢哋去年盈利就有成一百二十億美元，喺銀行嘅手頭現金就有成一百四十億美元啦！