SOHO中國（00410）主席潘石屹一向敢言，經常喺微博爆料，尋日佢就將自己嘅瘀事公開，可能想大家關注吓佢，甚至同情吓佢，點知一發不可收拾，一日內有超過六千條回應，可惜都係揶揄佢居多！
潘石屹話，佢買咗對鞋，但着咗一陣隻腳就起晒水泡，嗰陣先至發現原來對鞋一隻係八號，一隻係七號，明顯就係畀個售貨員呃咗！
網友一丁點同情心都冇，反叫潘總千祈唔好怪個售貨員，因為對鞋一隻賣緊嘅係建築面積，另一隻賣緊實用面積，身為地產商，應該要體諒賣家嘅「苦心」。
有網友又借題發揮，買錯鞋去搵個售貨員，好易換番對一樣SIZE嘅鞋，而小市民買咗樓，發現建築面積同實際面積有好大誤差都好，發展商根本就唔會理。
余詩韻