投行界名人高寶明做CEO嘅美資投行派杰亞洲（Piper Jaffray），尋日傳出結業，派杰入面好多員工通知行家呢個消息，絲絲都收到，真係幾愕然，派杰唔係話九月底先係賣盤「死線」咩，點解早咗成個月？
絲絲即刻搵老友Alex（高寶明洋名），佢反而話「無感慨，花開花落好正常啫」，Alex話市道好差，要結業都無辦法，佢話公司大部分員工尋日遣散，下星期留番小量人手清理證券戶口，到搞掂晒佢就會去旅行散心，至於絲絲最關心佢幾時再起爐灶，Alex話要睇個市先。美國派杰係喺○七年底，收購Alex創辦嘅金榜投資，變身為派杰亞洲。
另一個喺派杰做嘅老友尋日都通知絲絲，話佢執緊包袱，佢話其實公司七月底宣布，打算將本港嘅派杰亞洲業務賣盤或執笠，公司啲人打定輸數，事關個市道真係唔好，有財力買嘅主要係中資，但內地A股弱勢大家都睇到。
老友話本來同廣發證券傾得好好哋，但七月就因價錢問題告吹，之後關鍵嘅八月，有傳過同民生證券、上海銀行傾過，但據聞人哋只係要部分團隊，而唔肯成間公司買，結果又傾唔成，而公司八十幾人嘅人工同舖租，要幾百萬一個月，結果決定提早壯士斷臂。
余詩韻