絲絲講場:調查:港人對股市最悲觀

香港人唔再悲觀!萬事達消費者信心指數調查顯示,本港消費者信心兩年以來第一次回升,對未來六個月嘅前景由悲觀轉向中立,整體信心指數由舊年年底29.9悲觀水平,上升至今年年中嘅51.8中立水平,上升幅度更加係14個亞太區市場之冠!

呢次調查喺25個市場訪問咗逾萬名消費者,喺五項經濟指標中,本港受訪者對股市最悲觀,有關指標雖由23.3回升到39.4,但係仍屬悲觀,而對固定收入就最樂觀,有關就業、生活質素同經濟嘅指標就回復中立。

經濟料已見底

MasterCard Worldwide香港及澳門區總經理孫奕朗話,香港消費者信心經歷兩年下跌之後得以回升,係由於固定收入嘅前景更樂觀。不過,受歐債危機纏擾,市場成日傳出負面消息,建銀國際研究部董事及首席經濟師林樵基話,之前情況較為極端,依家市場憧憬內地有振興經濟措施,希望歐洲方面有正面消息,加上下半年假期比較多,對提升消費者信心都會有幫助。

林樵基仲話,因為遊客少咗,本港嘅消費情況不如去年,第二季經濟改善咗少少,預計本港經濟已經見底,但係復甦速度緩慢,隨住有更多基建項目推出,希望對就業情況有所幫助啦。