絲絲講場：經紀上書特首促停減佣戰
近期大市成交淡，又見經紀行減佣金，證券及期貨專業總會會長王國安又同絲絲呻，話啲細經紀行真係好慘，話會拉埋本港八大經紀業團體，約特首CY梁振英，想同佢面談同遞請願信，希望最快呢個禮拜成事。
籲搞佣金二級制
王國安話，有行家將佣金減到幾蚊好離譜，等於趕絕同行，依家佣金已經減無可減。八大經紀業團體口號係「停止佣金割喉戰」，團體會長已經聯署，準備呈交CY同財經事務及庫務局局長陳家強，希望交易所立例監管，佢哋建議設佣金下限，推動佣金二級制，規定20萬元或以下股票交易，最少要收0.25%佣金。
有參與早前減佣戰嘅經紀行話，咁做並唔係想同行家爭客或者打對台，其實每間證券行都有唔同策略，而低佣金同高佣金證券行其實都可以並存，佢哋只係希望開拓新市場先至推優惠。至於日後會唔會再有證券行家減價，依家唔敢評論住。