港交所（00388）行政總裁李小加呢排真係好鬼忙，經常要飛英國傾收購LME（倫敦金屬交易所），查實佢同英國都好有緣分，因為佢係紅魔鬼曼聯嘅擁躉，但曼聯先排想嚟香港上市，佢鐵面無私拒絕咗。
絲絲尋日同李小加食飯，佢就自爆係曼聯躉，屋企仲有好鬼多曼聯標誌波衫，咁絲絲就笑問佢點解唔放行曼聯喺香港上市呢，搞到人哋要轉去美國上，小加就好正經咁話：「（曼聯）達不到港交所的上市要求，我說不行」。
咁小加成日要去英國開會，有無順便喺倫敦睇奧運呢？佢就話忙到喺英國開完會就即刻飛返香港，邊有時間睇奧運，佢話到依家都無時間放大假，睇怕都要等到LME單嘢年底完成先。
唔講唔知，早前小加講解收購LME鴻圖大計嘅圖表，似足個扭計骰，個idea原來真係咁出嚟，但佢話自己就玩得唔叻，只可以整到單面一樣色喎，不過佢囝囝就好勁。
另外，早前有報道話小加同中聯辦密會後，就放行中國高精密（00591）復牌，小加就好勞氣咁話，佢有好多朋友同應酬，而佢係有同學喺中聯辦，不過公私拉埋一齊聯想作古仔就唔啱，上市科嘅嘢佢根本唔會插手。而且佢自己都好識避嫌，好少出席政治場合，甚至同CY梁振英都好似無單獨影過相。